Poslovne vesti - Makedonija

Заштеда на струја до 15%, ако компаниите се енергетски ефикасни

Заштеда на потрошувачката на електрична енергија од 10% до 15% ќе имаат компаниите доколку го имплементираат проектот за индустриски менаџмент на УСАИД. Проектот покрива 50 проценти од трошоците, со износ до 20.000 долари по компанија, а со него предвидено е да бидат опфатени 17 компании.

Како што велат од УСАИД, со воведувањето системи за мониторинг и управување на потрошувачката на струја, осум домашни компании, каде тој веќе се имплементира, очекуваат покрај заштедите да реализираат пониски цени на производите и со тоа значително да ја подобрат конкурентноста.

- Овие системи ќе им помогнат на компаниите да можат подобро да планираат, да балансираат и да имаат увид во реално време на потрошувачката на електрична енергија и на тој начин позитивно и профитабилно да ги решаваат состојбите, како и да склучат поповолни договори за набавка на електрична енергија од трговците или снабдувачите. Тоа се однесува за тие што се веќе на слободниот пазар на електрична енергија и за сите останати што од 1 јануари 2015 ќе станат дел од слободниот пазар - вели Драган Блажев, директор на проектот и експерт за енергетска ефикасност.

Според него, со овие активности се зголемува свеста од потребата од конкретни мерки за подобрување на енергетската ефикасност во компаниите.

- На тој начин се придонесува за поефикасно и попрофитабилно работење на компаниите особено оние што се насочени не само на домашниот, туку и на странскиот пазар каде се соочуваат со конкуренција со компании кои имаат воведено вакви системи и им помагаат да ги намалат трошоците за струја, како дел од вкупните трошоци, потенцира Блажев.

Тој очекува проектот да биде мотив и останатите индустриски компании да се заложат за намалување на потрошувачката на енергија, што за нив значи намалување на трошоците на работењето, помала цена на производите и поголема конкурентност на пазарот.

Една од компаниите, која е дел од проектот Здравје Радово", велат дека главна цел им е зголемување на конкурентноста и заштеда на струја во производствениот процес. Според нив овој систем ќе им биде неопходен и од аспект на либерализацијата на пазарот на електрична енергија, бидејќи како балансно одговорна страна сами треба да нарачуваат електрична енергија од слободниот пазар.